ویڈیو: خیبرپختونخوا کے مشیر خزانہ مزمل اسلم نے وفاق کو صوبے کا قرضدار قرار دے دیا

پشاور: خیبرپختونخوا کے مشیر خزانہ مزمل اسلم نے وفاق کو صوبے کا قرضدار قرار دے دیا ہے۔

تفصیلات کے مطابق خیبر پختونخوا کے مشیر خزانہ مزمل اسلم نے اے آر وائی نیوز سے گفتگو کرتے ہوئے کہا کہ وفاق سے ہمیں 600 ارب نہیں 93 ارب روپے ملے ہیں، پنجاب ہمارے منصوبوں کی تقلید کر رہا ہے، پنجاب کے پاس سوائے ٹک ٹاک کے کچھ بھی نہیں۔

انھوں نے کہا وفاق ہر وقت کہتا ہے کہ انسداد دہشت گردی کی مد میں 600 ارب دیے گئے، لیکن کے پی کو صرف 93 ارب روپے انسداد دہشت گردی کی مد میں ملے ہیں، وفاق خیبرپختونخوا کا قرضدار ہے۔

مشیر خزانہ کے پی نے کہا کے پی حکومت نے 140 ارب پولیس پر، 106 ارب ضم اضلاع پر خرچ کیے، ضم اضلاع کے لیے ہمیں صرف 66 ارب روپے ملے، 40ارب روپے صوبے کے وسائل سے ضم اضلاع پر خرچ کیے گئے، وفاق نے نیٹ ہائیڈل پاور، آئل اینڈ گیس رائلٹی کے پیسے دینے ہیں، انضمام کے 3 فی صد اضافی دینے کا بھی وعدہ کیا گیا لیکن آج تک ایک روپیہ نہیں ملا، اگر وفاق نے ہمارے حصے کے علاوہ کوئی پیسے دیے ہیں تو وہ بتائے۔

ان کا کہنا تھا کہ ہر 3 ماہ بعد ضم اضلاع کے پیسے ملنے چاہئیں لیکن ابھی تک نہیں ملے، وفاق باقی صوبوں کو اضافی پیسے دے رہا ہے لیکن ہمیں اپنے پیسے نہیں مل رہے، احساس اپنا گھر، کامیاب جوان اور صحت کارڈ سارے منصوبے ہمارے ہیں، پنجاب کوئی ایک منصوبہ بتا دے جس کی ہم نے نقل کی ہو، ہم پنجاب کو سکھا رہے ہیں یہ لوگ پھر ہماری تقلید کرتے ہیں، پنجاب حکومت سے ہم صرف ٹک ٹاک ہی سیکھ سکتے ہیں۔

مزمل اسلم نے کہا وزیر اعظم نے سندھ کے سیلاب متاثرین اور بلوچستان کو پیکج دیے، لیکن وہ کتنی مرتبہ کے پی آئے؟ کیا صرف سیاست کے لیے ہم ہی باقی بچے ہیں؟

مشیر خزانہ نے کہا زرعی ٹیکس کے حوالے سے ملکی مفاد میں جتنی مدد کے پی نے کی کسی اور نے نہیں کی، جب ہماری حکومت تھی تو آخری ماہ میں شرح سود 2.25 فی صد بڑھ کر 11 فی صد ہو گئی تھی، پی ڈی ایم کی حکومت میں شرح سود تاریخ کی بلند ترین سطح پر 11 سے 22 فی صد پر گئی، 1998 میں جب ن لیگ کی حکومت تھی تب بھی شرح سود بڑھی تھی، شرح سود سے اگر اتنا اچھا کام ہو رہا ہے تو عام آدمی کیوں نہیں جا رہا قرض لینے؟ شرح سود کا سب سے زیادہ فائدہ حکومت کو ہے کیوں کہ سب سے زیادہ وہ قرضہ لیتی ہے۔

from ARYNews.tv | Urdu – Har Lamha Bakhabar https://ift.tt/l47pPz9