وفاق سے خیبرپختونخوا کے کن 52 ترقیاتی منصوبوں کو فنڈز جاری نہیں ہوئے؟ جان کر حیران رہ جائیں گے

اسلام آباد: وفاقی حکومت کی ترقیاتی بجٹ میں کٹوتی کی وجہ سے خیبرپختونخوا میں 52 ترقیاتی منصوبے فنڈز سے محروم ہو گئے ہیں۔

سرکاری دستاویز کے مطابق رواں مالی سال خیبرپختونخوا کے 52 منصوبوں کے لیے رقم جاری نہیں کی گئی، جس کی وجہ سے ترقیاتی منصوبے تاخیر کا شکار ہو چکے ہیں۔

خیبرپختونخوا میں جاری 94 ترقیاتی منصوبوں کی لاگت 911 ارب 52 کروڑ روپے ہے، رواں مالی سال 94 منصوبوں کے لیے 49 ارب 74 کروڑ روپے کا ترقیاتی بجٹ مختص تھا، لیکن جاری 42 منصوبوں کے لیے صرف 6 ارب 29 کروڑ جاری کیے گئے۔

دستاویز کے مطابق خیبر پختونخوا میں جاری این اے ایچ کے 15 ترقیاتی منصوبے فنڈز سے محروم ہیں، کمیونیکیشن ڈویژن کے 2، ایوی ایشن ڈویژن کا ایک ترقیاتی منصوبہ، کے پی کے اسٹیبلشمنٹ ڈویژن کے 3 ترقیاتی منصوبوں کے لیے بھی فنڈز جاری نہیں کیے گئے۔ کے پی ہاؤسنگ اینڈ ورک ڈویژن کے تمام 9 ترقیاتی منصوبوں سمیت کے پی اطلاعات اور داخلہ ڈویژن کے منصوبوں کے لیے بھی تاحال رقم جاری نہ ہوئی۔

بنوں اور کوہاٹ میں یورینیم ذخائر کی تلاش کا اٹامک انرجی کمیشن کا منصوبہ بھی محروم ہے، اٹامک انرجی کمیشن کے منصوبے کے لیے 31 کروڑ روپے مختص کیے گئے تھے، کے پی میں جاری پاور ڈویژن کے 5 ترقیاتی منصوبوں کے لیے بھی تاحال رقم جاری نہ ہوئی، ریلوے ، ریونیو، سائنس و ٹیکنالوجی اور آبی ذرائع کے منصوبے بھی فنڈز سے محروم ہیں۔

from ARYNews.tv | Urdu – Har Lamha Bakhabar https://ift.tt/Xji3Shc