پنجاب میں کرونا کیسز کی شرح اور اموات میں اضافہ

لاہور: صوبہ پنجاب میں کرونا کیسز کی شرح اور اموات میں اضافہ ہوگیا، گزشتہ روز پنجاب کے تمام شہروں میں کرونا وائرس کی مجموعی مثبت شرح 7.8 فیصد ریکارڈ کی گئی۔

تفصیلات کے مطابق سیکریٹری صحت پنجاب کا کہنا ہے کہ صوبے میں کرونا کیسز کی شرح اور اموات میں اضافہ ہو رہا ہے، صوبائی دارالحکومت لاہور میں کرونا وائرس کے مثبت کیسز کی شرح 10.4 فیصد تک پہنچ گئی۔

سیکریٹری کا کہنا ہے کہ گزشتہ روز پنجاب کے تمام شہروں میں کرونا وائرس کی مجموعی مثبت شرح 7.8 فیصد ریکارڈ کی گئی، راولپنڈی میں 7.6 اور ملتان میں 11 فیصد مثبت شرح ریکارڈ کی گئی۔

صوبے میں گزشتہ 24 گھنٹے کے دوران 1 ہزار 718 نئے کیسز رپورٹ ہوئے، لاہور میں 16 سمیت پورے پنجاب میں گزشتہ روز 54 اموات رپورٹ ہوئیں۔

سیکریٹری صحت کے مطابق صوبے میں اموات کی تعداد 11 ہزار 757 ہو گئی۔

خیال رہے کہ پنجاب سمیت ملک بھر میں گزشتہ 24 گھنٹوں کے دوران کرونا وائرس کے 120 مریض انتقال کر گئے جس کے بعد کرونا وائرس سے مجموعی اموات کی تعداد 25 ہزار 535 ہوگئی۔

گزشتہ 24 گھنٹوں کے دوران کرونا وائرس کے 4 ہزار 191 نئے کیسز رپورٹ ہوئے، ملک میں کووڈ 19 کے مجموعی کیسز کی تعداد 11 لاکھ 48 ہزار 572 ہوچکی ہے۔

The post پنجاب میں کرونا کیسز کی شرح اور اموات میں اضافہ appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/3BbjfN8