ابوظہبی کے ولی عہد شیخ محمد بن زید النہیان آج پاکستان پہنچ رہے ہیں

اسلام آباد : ابوظہبی کے ولی عہد شیخ محمد بن زید النہیان آج پاکستان پہنچ رہے ہیں ، دورے میں وزیراعظم عمران خان سے ملاقات کریں گے، جس میں باہمی تعلقات ،علاقائی وعالمی صورتحال پرتبادلہ خیال کیا جائے گا۔

تفصیلات کے مطابق ابوظہبی کے ولی عہدشیخ محمد بن زیدالنہیان آج پاکستان کا دورہ کریں گے، وزیراعظم عمران خان کچھ دیر بعد نورخان ایئربیس روانہ ہوں گے، جہاں پر وہ یواےای کےولی عہد کا استقبال کریں گے۔

پاکستان میں متحدہ عرب امارات کے سفیر حماد عبید الزبی نے اپنے بیان میں کہا تھا کہ دورے میں ولی عہد وزیراعظم عمران خان سے ملاقات کریں گے، جس میں باہمی تعلقات بڑھانے ،علاقائی و عالمی صورتحال پر تبادلہ خیال ہوگا۔

سفیر حماد عبید الزبی کا کہنا تھا ولی عہد کے دورے سے باہمی دوستی کے تعلقات کو مزید تقویت ملے گی۔

خیال رہے ابوظہبی کے ولی عہد کا دورہ انتہائی اہم نوعیت کا ہوگا، یہ دورہ کوالالمپور سمٹ میں شرکت نہ کرنے کے تناظرمیں انتہائی اہمیت اختیار کر گیا ہے۔

یاد رہے گذشتہ سال نومبر میں وزیراعظم عمران خان کا ابوظہبی کے ولی عہد شیخ محمد بن زید النیہان سے ٹیلی فونک رابطہ ہوا تھا، جس میں دونوں رہنماؤں نے باہمی تعلقات اور اہم عالمی امور پرتبادلہ خیال کیا گیا تھا۔

واضح رہے کہ گزشتہ ہفتے سعودی وزیر خارجہ فیصل بن فرحان السعود بھی پاکستان کا دورہ کر چکے ہیں، دورے میں انھوں نے وزیراعظم عمران خان سے ملاقات کی تھی، ملاقات میں مقبوضہ کشمیر سمیت دو طرفہ تعلقات اور خطےکی مجموعی صورت حال پر تبادلہ خیال کیا گیا تھا۔

The post ابوظہبی کے ولی عہد شیخ محمد بن زید النہیان آج پاکستان پہنچ رہے ہیں appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/2tiTfSq