ایران کا پابندیاں برقرار رکھنے پر آئی اے ای اے کیساتھ تعاون معطل کرنے کی دھمکی

تہران (21 ستمبر 2025): ایران کے اعلیٰ سکیورٹی ادارے نے خبردار کیا ہے کہ فرانس، جرمنی اور برطانیہ کی طرف سے پابندیاں دوبارہ عائد کرنے کی کارروائی پر تہران کو اقوام متحدہ کے جوہری نگراں ادارے (آئی اے ای اے) کے ساتھ تعاون معطل کرنے پر مجبور کرے گی۔

ایران کی سپریم نیشنل سکیورٹی کونسل (SNSC) کی یہ دھمکی اُس وقت سامنے آئی جب گزشتہ روز اقوام متحدہ کی سکیورٹی کونسل تہران کے خلاف پابندیوں کو مستقل طور پر ہٹانے کی قرارداد کو اپنانے میں ناکام رہی۔

قراردار پر ووٹ اُس وقت طلب کیا گیا جب تین یورپی ممالک نے 28 اگست کو 30 روزہ عمل شروع کیا تاکہ ایران پر اقوام متحدہ کی پابندیاں دوبارہ عائد کی جائیں۔ انہوں نے مؤقف اختیار کیا کہ تہران نے 2015 میں اپنے جوہری پروگرام کو محدود کرنے کیلیے کیے گئے معاہدے کی خلاف ورزی کی۔

واضح رہے کہ روس اور چین نے ایران پر پابندیاں دوبارہ عائد کرنے کی کوشش کو مسترد کیا ہے۔

سپریم نیشنل سکیورٹی کونسل کے اجلاس کی صدارت صدر مسعود پزشکیان نے کی۔ اجلاس میں کہا گیا کہ تین یورپی ممالک کی جانب سے کیے گئے اقدام کو غیر دانشمندانہ قرار دیا جاتا ہے۔

اجلاس میں کہا گیا کہ اقدام نے آئی اے ای اے کے ساتھ تعاون کو نقصان پہنچایا جس کا مقصد نگرانی بحال کرنا اور بین الاقوامی قوانین کی تعمیل کو یقینی بنانا تھا۔

سکیورٹی کونسل کے اعلامیے میں کہا گیا کہ اسلامی جمہوریہ ایران کی وزارت خارجہ کے جوہری نگراں ادارےکے ساتھ تعاون اور مسئلے کو حل کرنے کیلیے پیش کیے گئے تجاویز کے باوجود یورپی ممالک کے اقدامات ایجنسی کے ساتھ تعاون کے راستے کو مؤثر طور پر معطل کر دیں گے۔

from ARYNews.tv | Urdu – Har Lamha Bakhabar https://ift.tt/q2OHrIK