کاروبار میں بندش ، کراچی کے تاجروں کو بڑا ریلیف مل گیا

کراچی : وزیراعلیٰ سندھ سید مراد علی شاہ نے اعلان کیا ہے کہ صرف اتوارکاروباربند ہوگا اور دیگر دن کاروباری سرگرمیاں جاری رہیں گی۔

تفصیلات کے مطابق وزیراعلیٰ سندھ سید مراد علی شاہ کی صدارت میں کرونا وائرس پر صوبائی ٹاسک فورس کا اجلاس ہوا، اجلاس میں صوبائی وزراء، ڈاکٹر عذرا پیچوہو، سعید غنی، ناصر حسین شاہ، جام اکرام اللہ دھاریجو، مرتضیٰ وہاب، چیف سیکریٹری، آئی جی پولیس، ایڈیشنل چیف سیکریٹری داخلہ، صوبائی سیکریٹریز، ڈاکٹر باری، ڈاکٹر فیصل، ڈاکٹر سارہ خان، ڈاکٹر قیصر سجاد، کور فائیو اور رینجرز کے نمائندے شریک ہوئے۔

وزیراعلیٰ سندھ نے کورونا صورتحال کے حوالے سے بتایا کہ کوویڈ 19 کے مریضوں کی تشخیص کی شرح 4.5 فیصدپرآگئی ہے، اسپتالوں پر اب کچھ دباؤ کم ہواہے، کراچی میں کورونا کیسز کی تشخیص کی شرح 9.5 اور حیدرآباد میں 5.65 فیصد ہے جبکہ جون میں ابتک 192 مریضوں کا انتقال ہوچکا ہے۔

وزیراعلیٰ سندھ نے کہا کاروبار میں بندش کا فیصلہ این سی او سی کے مطابق کیا جائے گا، صرف اتوار کاروبار بند ہوگا اور دیگر دن کاروباری سرگرمیاں جاری رہیں گی۔

دوسری جانب اجلاس میں یہ بھی فیصلہ کیا گیا کہ چھٹی سے 8ویں جماعت کی کلاسز 50 فیصدحاضری کیساتھ کل سے کھولی جائیں گی جبکہ کورونا صورتحال میں بہتری کی صورت میں پرائمری کی کلاسز 21جون سےکھولی جائیں گی۔

یاد رہے گذشتہ ہفتے محکمہ داخلہ سندھ نے کورونا ایس او پیز کا نیا حکم نامہ جاری کیا تھا ، جس میں کہا گیا تھا کہ کاروباررات 8 بجے تک کھولنے اور شادی ہالز بند رکھنے کا فیصلہ کیا گیا ہے تاہم بیکریاں اوردودھ کی دکانیں رات 12 بجے تک کھولنےکی اجازت ہوگی۔

The post کاروبار میں بندش ، کراچی کے تاجروں کو بڑا ریلیف مل گیا appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/2TtpHhK